Mignonne, allons voir si la rose
Qui ce matin avoit desclose
Sa robe de pourpre au soleil,
A point perdu ceste vesprée
Les plis de sa robe pourprée,
Et son teint au vostre pareil.
Las! voyez comme en peu d'espace,
Mignonne, elle a dessus la place
Hélas! ses beautez laissé choir!
A vrayment marastre nature,
Puis qu'une telle fleur ne dure
Que du matin jusques au soir.
Donc, si vous me croyez, Mignonne,
Tandis que vostre age fleuronne
En sa plus verde nouveauté,
Cueillez, cueillez vostre jeunesse:
Comme à cette fleur la vieillesse
Fera tenir vostre beauté.
|
![[Zur Startseite]](/images/misc/logo-new.gif){kind=logo}
